Press "Enter" to skip to content

AHODAH NAA THIM LAI?

Sister Yuen Meng’en timi nu hi Shanghai khuapi chung i mirum bik hna lakah aa telmi chungkhar ah a chuakmi a si. A pasal he an i then i a fapa kum 11 le a fanu kum 9 he khua an sa. Jesuh a zumhnak ruangah 1967 ah thongah an thlak. Kumkhat a tlak hnuah PSB (Police Security Bureau)nih an zaang a faak ngaingai. Thonginn uktu nih “Kumkhat chung kan in ngiat lengmang tikah mitha ngaingai na si ti kan theih, cu ruangah laksawng pek kan in duh.

 

Na sualnak i ngaichih law kan in chuah lai i na fale he nuam tein nan umti kho lai. Hihi na Pathian duhning zong a si hrimhrim lai” tiah a ti. A fapa le a fanu zong thonginn ah an ratpi hna. Sister Yuen nih a fale a hmuh hna tikah a thinlung cu namte chunh bangin a faak. A fale a hmuh hna bak in a mitthli cu “kur-kur” in a tla.

 

Nawlngeitu hna nih cun hitihin bia an hal. “Zeidah na duh deuh, Jesuh maw na duh deuh na fale?
Jesuh na duh deuh a si ahcun hi thonginn chungah na um lai,  na fale na duh deuh hna a si ahcun
inn ah nuam tein nan tlung lai”.

Cuticun a duhthimmi tialnak ah catlap le cafung an pek. Catlap cungah Sister Yuen nih a tialm an hmuh tikah cun an khuaruah a har. Hi nu hi mihrut taktak pei a si ko hi, an ti. Cafang ngan pipi in hitihin a tial! “Jesuh cu zeihmanh nih a ai an rawlh kho lo. Ka fale zong nih Jesuh ai  an rawlh kho lo”

 

Thonginn uktu pa cu thinhung ngai in a hung au. Ngakchia hna, ngai tuah uh, hringtu nan nu nih an hlawt cang hna, an duh ti hna lo, tiah a ti hna. Cuticun Sister Yuen cu kum 23 chung thong tla dingin bia an ceih. Thonginn in an fale an kir cu a hei zoh peng hna. A fale nih voikhat te tal vun ka zoh hna sehlaw ti a duh tuk nain an zoh duh lo, a mit hmuh in an liam riangmang. A thinlung kehkuai dih aa zal. A mitthli nih a thongtlaknak angki cu a ciarter dih. Zeiti awk tha ne mu! Sister Yuen nih Jesuh nak in thim deuhmi a ngei kho lo.

 

Thonginn in s chuah ahhin Sister Yuen cu kum 81 a si cang, a fapa zong 34 a si ve cang i Tibet ah cozah riantuan in a um. Thong a tlak chung vialte a fale voikhat hmanh a hmu hna lo. A fapa cu cozah nih an lak i Sport sianginn ah an kaiter. Khrihfa tampi nih an va ton i thawngtha an chimh tawn. Asinain anih nih cun “Nan Jesuh nih ka nu a ka chuh cang, zeitindah amah cu ka zumh khawh ti lai?” tiah a rak leh hna. Sister Yuen cu a fapa ton dingin Tibet ah a kal. Asinain a fapa nih a rak cohlang duh ti lo. A nam i “kei cu nu ka ngei lo” tiah a rak ti. Sister Yuen cu ngaihchia le lungfak ngai in a kir than.
Keimah ruangah…a fale…a kaltakmi cu a letzakhat in a hmuh than lai i zungzal nunnak kha pek a si lai.
Mtt 19:29

Nu le pa, u le nau, hawikom dawt hna! Nangteh Sister Yuen dirhmun ahhin um law ahodah naa thim deuh hnga? Caan tampi ah Jesuh nak in kan duh deuhmi le kan i thim deuhmi hi a um lengmang. Jesuh hi kan nunnak ah PKHATNAK si peng ko seh. Duhthim dingmi vawlei thil tampi lakah Jesuh hi i thim ko usih.

Credit: Chim Thli

error: Content is available