Press "Enter" to skip to content

Ralzam Phungning In An Kir Lai maw? By Salai Ram Tinthei

Kawlram Australia Palai (Myanmar Ambassador to Australia), Perth khuasa Kawlrammi hna a vun kan ton lio ah ralzam kirnak kong zeidah nan policy asi? tiin biahalnak ka rak tuah. Nikum ahkhan asi. A bia a merh i a ka thlau piak lengmang nain, voi 3 tiang kaa nolh than. A ka let kho thailo. Rohingya lei a merh lengmang i a donghter. A bia mukhat hnu mukhat in char le indirect in ruah ahcun “Kawlrammi ralzam an umlo” ti khi asi.

 

 

Kawlram Cozah nih tuni tiang ralzam in ramkip ah millions in kan tlik le kan zammi hi an itheihter lo. Ralram an um tiin an cohlan le kirnak ding kong an khan ahcun Kawl Ralbawi hna i kum 60 chung an thurhnawmnak le an nawnnawkmi vialte khi admit (kan sual ko) ti an cohlan khi asi hnga. Mah cucu an itheihter duhlo i, tuni tiang ramkip sinah an iphetsuat peng rihmi asi.

 

 

Cu caah ralzam phungningte in kirnak (voluntary repatriation) tuah khawh ding le ceihkhawh ding asi rihilo. Rampi Kahdaihnak Minthutmi NCA ningin le 21st Century Panglong Conference pi ah ceihkhan te dingin Social Sector tlangtar ah “Refugees and IDPs” kong hi ceihrihlo ding (pending) in a um rih. Hi kong a vun phak tik ahhin ralkap he biatakte in iphomh te ding asi caah fawi le bai in ceih khawh asi te lailo, a har ngai te lai. A cunglei i paper khi Tlangcungmi Hriamtlaibu leiin saduhthah langhtermi asi i, kan duh ning hna in pompiak asi te hnga dek maw? ruahdamh a har ngaingai. Zeitik ah dah hi vialte hi hnatlak min an thut lai i tuan thawk asi lai tihi chim a har ngaingai. Atu ningte asi ko ahcun NCA le Political Dialogue hi kum caan saupi a rau rih lai tihi zumh ciomi asi.

 

 

Cu caah ralzam phungningte in kirnak kong timi hi kan ruah rihlo le kan khan rihlo a hau i, kan tuah khawh dingmi zong asi rihlo. Kir dingah a him lawngah tuanchuah dingmi asi. Ram a dai cang maw? ti tik ah; Tlangcungmi hmunkip ah ikahnak le Kawlrawn ah buainainak nikhat hnu nikhat a zual chinchin. UNHCR leiin a nawr len zongah Kawlram Cozah nih a cohlan lo ahcun pakpalawng asi. Rampi a daih taktak lo ahcun a tuah ding zong asilo. NLD Cozah luri in an um i, “rampi a daih cang caah rak kir cang uh” timi sawmnak a um lo. Cu caah kanmah Chin miphun chungin kirnak kong khuakhan len hi san a tlai lomi rian asi.

 

 

Chin miphun kan nau ram 2nak i ralzam in 50,000 renglo hna caah ramkip um Chin miphun dihlak nih kan pawngkam i kan Cozah hna innka cio kan kingh rih i kan nawr len a hau ko. Tutiang ah Australia, US le CHRO leiin cawlcangh cuahmah asi i, Europe lei hi thawngpang a dai ngai rih, Geneva innka hram ah a thumi an si. Timhtuahnak cu an ngei theu lai ka zumh. Kan Cozah sin cio ah kan chim ahcun aw-aan a ngeimi rammi sinak a ngeimi lawngte kan si ko hna.

 

 

Tukar cu Malaysia lei tlaihkhih a tam, card chuhmi tete an tam caah chungsi vangh le lungrawh in nunnak a liammi tete thawng vun theih ko ah lung a faak, umsia a remlo. Chin miphun kan zatlaang (society) ahhin biaknak leiin ithithruai ah thazaang a thawn deuh caah Biaknak lei kan pale fak deuh in an vun ithlak lo ngaingai hincun, lam a tluang kholo. Biatak deuh in Communities lei he Biaknak lei he hmai kan ithlak cio a haumi rianpi rianlian asi.

 

Credit- Salai Ram Tinthei

error: Content is protected !!