Press "Enter" to skip to content

A Thurhnawmtuk Mi Chin Party Pawl Politic Khelh Ning le Mi Lemsoi Ning

Nai cu Laitlang khuate khua upa pakhat he kan i chawn i a ka chimhmi cu Chin Party pawl kan vote hna nak a ruang a biapi bik cu CNF/A he ai pehtlai mi le ai bawmmi bantuk in Chin Party palai a rami pawl nih a kan chimh, an nih hi a leng langhngan in rianttuantu si i a chung ah CNF/A itel bantuk in an kan chimh caah CNF/A cu kan ttanhmi hna le kan upatmi hna le kan bochan mi hna an si caah anmah he ai pehtlaimi party cu thazaang kan pek hna i Vote kan pek hna nak a si tiah a ka chimh.

Cucu a si taktak ko maw? A ho nih dah cuti cun a chim tiah ka hal i si e voi hnih an i cuh cangmi chung ah a voi hnih tein an palai a vakmi pawl nih an kan chimh. A ho nih ka ti tikah an zate in an chim viar tiah a ka ti i ka lau ko. CNF/A nihhin kum tampi a liam cangmi ah biachahnak a tuahmi cu; CNF/A nihhin zei bantuk ramkhel party hmanh thapek hleimi, ttanh hleimi (support) deuhmi, pehtleih deuhmi ngeih lo dingin biachahnak a rak tuah cang. Cu phung cu tuchun ni tiang CNF/A an zulh peng i a nung peng rih. Hlonh a si rih lo.

CNF/A kan pale an kalnak kip i bia an chimnak le bia an halnak hna zong ah CNF nih ttanhmi party kan ngei lo tiah an chim peng. Asinain, Chin Party hruaitu hrokhrol pawl nih Mee (vote) hmuh duh ah Khuate zei thei lo pawl sin ah CNF/A he ai khat le ai bawm bantuk in bia an chimh hna. An soilem pah hna an hro pah hna. Hihi lih le hrokhrol in politic tuah a si. A thurhnawm mi politic a si. Hi bantuk a dik lomi le a hman lomi politic tuah hi Chin party hruaitu pawl nih an ngol awk a si. CNF/A min hmang in hro le cer bu in politic khelh cu a chiakha taktak mi si.

Cucaah khuate a thei lomi pawl kha careltu nih rak chim cio hna uh. Chin party kha CNF/A nih support mi le ttanhmi, pehtlaihmi party a si lo. Anmah tein a dirmi party an si ti kha rak chim cio hna uh. Cun Chin party pawl hi bantukin politic khelh an hman caah CNF/A zong nih mipi theih bak in statement chuah ah a ttha. A tu a ralaimi thimnak zong ah khuate cheukhat cu anmah duhmi vote ngam loin Chin Party a vote mi an um hoi te lai. Cucaah CNF nih mipi theih in statement chuah lawlaw a hau cang.

Chin party pawl an politic khelhning a thurhnawmh khunnak cu CNF support mi titiang deuh cu va sisehlaw ai ning deuh rih. An lih ko bu ah. Nain hrocer chih an hmanmi hrimhrim hi a tthalo tukmi a si. Hi hnu hrimhrim ah Chin Party palai nih hi bantuk bia nan khua ah an chim ahcun a chimtu pa kha video record in rak tuah uh. Chin Party pawl hi bantuk a thurhnawm ramkhelh ning hi nan hlonh hrimhrim a hau.

Note: Hi hmanthlak a langmi thengte lawng hi Chin Party pawl kan aiawh ter lo.

error: Content is available