Press "Enter" to skip to content

Iran Nih A Ram Chung Buainak Kongah Israel Sual A Puh

Israel Prime Minister Netanyahu nih caan tha tlolh loin Iran cozah a tuk cang hna. Cozah doh in sandah a piahmi pawl hna sinah youtube in thazaang peknak bia a chim colh. ‘A sualmi cozah nan dohmi hi mi raltha hna riantuan a si’ tiah a thangthat hna.

Mr. Netanyahu nih a peh thanmi cu ‘nihin ah President Rouhani nih Israel sual a kan puhnak bia a chimmi ka theih. Iran mipi sandahpiahnak hi Israel ruangah a si a kan ti. Nihchuak a si. A hmaanmi zong a si lo. Rouhani bantukin Iran mipi cungah volhpamhnak bia ka chim lai lo.

Iran mipi hi thil tha hmuh aa tlakmi an si tiah Prime Minister Netanyahu nih a chim. Iran cozah doh in sandah a piahmi pawl hi Israel le US sungthoh riantuannak a si lai tiah a zummi zong an um hna. Iran President Rouhani nih a pek thanmi cu ‘mipi sandahpiahnak hi Saudia Arabia nih lam an sial i, Israel le US nih an bawmh hna tiah a chim chih.

‘Lam cungah mi raltha Iran mipi an chuak thluahmah hna. Zalonnak a kawlmi an si. Dinnak an kawl. An covo an kawl. Iran cozah nih an pek duh bal hna lomi an nun covo an kawl. Iran cozah hi huatnak karhternak caah billion in thangka a hmangmi an si. Hi tangka in sianginn hna an sak ding a si.

Sizung hna an dirh ding a si. Nubik le pabik tiang in lam ah an chuahmi hi an mawh hrimhrim lo. Iran cozah nih an tih tuk hna. Mah ruangah thong zong ah an thlak hna. Social media zong an kham dih’ tiah a chim chih.

Europe ram pawl hna zong daidup in nan um. Iran mipi nan dirkamh hna lo tiah fak ngaiin a mawhchiat chih hna. Iran mipi nan hlawhtling hram ko seh! tiah duhsaknak a chimh chih hna. Ref: TOI.

error: Content is protected !!