Press "Enter" to skip to content

Ka Nihchuak Ngaimi Kan Ram Evangelist 7 – Dr. Aung Myint Thang

KA NIHCHUAK NGAIMI KAN RAM EVANGELIST 7

1. Satawm i a rak ummi evangelist pakhat cu biatak phuangmi ka si a rak i ti. Vawlei kan tei cang titehna, vawlei ka tlaihchan awk a si lo titehna, kan minung nun hlun cu Khrih he vailamtah ah a thi cang titehna khi faakpiin a au pimi a si. Voi khat cu Yangon a tlawng. Yangon a phanh voikhat nak a si. Sule, Anawrattha lam khi a hrawng. Vawlei minung hna nih an sakmi inn le lo cu a zoh i a ar ko.

A mit a ttep ti lo. An chawdor a zoh. An signboard vialte cu rel dih a timh. Lam a zoh ti lo. Mi dawr le mi inn lawngte cu a cuan cang. Cuvial ahcun lungbomi ai chuih ciamman le a phanah hri kha hmun thum bakin an pong dih tiah a hmu tu pa nih a ka chimh. A phanah le a hri kha a daw lomi nu va tthen bakin an i tthen. A phanah kha Anawrattha motor lam ah a va tla. A hri kha mi dawr hmai ah a va tla tiah an ka chimh. A phanah le a hri cu a char hna i a bunh i ai danh tthan an ti. Cuhnu cu lam kha tthatein a zoh cang an ti.

 

2. A thin a tawi ngaingaimi evangelist pakhat cu Khampat ah thawngttha a rak chim. Acheu kha an mit a ku i an ngu an ti. Evangelist pa nihcun, “a ngu mi vialte nan mit va caw cawlh seh” a ti hna an ti. Pahnih cu an mit a caw taktak an ti.

3. Thawngttha chimtu pakhat pa cu fa a ngei kho lomi a si. Thla a cam poh ah “Bawipa! fapa na ka peek cang caah na min kan thangtthat” a ti peng ti a si. Kum 30 a rau cang atu tiang fapa cu a ngei hlei lo an ti.

 

4. Evangelsit pakhat pa cu thawngttha a chimnak poh ah “Baibal ai ken mi nan Baibal tlir uh” tiah a ti tawn hna. Baibal ai ken lomi pawl kha a phomh tawn hna. An zozarang a hlih tawn hna. Voi khat cu thlacampiaknak a tuah mi hna nih pumh an sawm ve.

Evangelist pa cu phungchimtu a si lo caah Baibal ai ken ve lo. Cu ni i phungchimtu pa nihcun Baibal ai ken mi nan Baibal tlir uh a ti ve hna. Phungchimtu nihcun evangelist pa cu “khawi! Nang na Baibal teh” tiah a hal. Kai ken lo tiah a leh. Baibal ken loin ziah Pathian na biak tiah amah tu kha midang phungchimtu nihcun an rak phomh ve. Huhuhuhu

 

5. Kan Laimi evangelsit pakhat cu Kachin ram ah thawngttha chim ah a kal an ti. Biatak ngai in tthawngttha a va chim an ti. Adonghnak ah cun mi sipawleih (kuak) kha buri kha a fir le ai zaampi an ti.

6. Kan Laimi evangelist pakhat pa cu Aizawl bazar i ai chawh lio ah hlawhhlangnu pahnih nih a cungah an lung a fah tuk caah nam in an dawi le thah an timh an ti. Thihnak chung in a luat nak hnga, evangelist pa cu a khup zong kiak dih deng in Aizawl step cho sen bak ah thi lo nung lo in a zaam an ti.

 

7. Evangelist theng a si lomi Pathian rianttuan vemi pakhat cu lung cungah a tthu ko i khua faak ngai in a ruat kha ka hei hmuh. Zei khua dah na ruah tiah ka hal. “A hlan ah sualnak tuah dingmi a rak rem tuk ko nain sualnak ka rak tuah lomi kha ka ruah ah kai chir tuk i cucu ka ruat” a ka ti. Sualnak tuah tu i chir lo i sualnak tuah lo hna i chir cu ka ti i ka khuaruah a har ngai.

Zei sualnak dah a tuah lo i ai chirmi cu a si hnga? Lai a nawn lomi cu si dawh a si lo. Mi thil a fir lomi cu si dawh a si lo? Bing a rak ei lomi cu si dawh a si loh? Zei sualnak dek a rak tuah lo caah ai chir tuk i a lung a faak tuk ko rua khah! Mifanau!

Credit: Dr. Aung Myint Thang

error: Content is protected !!