Press "Enter" to skip to content

Tuhrawng Kan Lai Online Media Cheukhat Le Kan Hrik Zohnak

Hriklunh hi thihnak ngai cu asi lo nain hrik nih lu an lunh cang ahcun a fawi lo. Hrik lunhmi lusam cu fih zong a nung i, pawngkam ca ah duk a tlai lo ngai. Hrik rual nih an ti kha sangra bang raang ko in an tit ta hoi i, a tizian hmanh rian khat bak a si hoi. Cu lawng hlah, ngan a dam lo i, rimchiat le hawi sin chuah ngam lonak tiang a chuah pi fawn. Cu hriklunh cu zei in dah a chuah ti ahcun filhhnawmh (lack of social structure) in a chuak, dingrep ngei lo, thathut le zaamdalh ruang bak ah a chuak. A bik in hawi tluk lo ruang ah a chuak.

 

 

Related image

 

 

Tuchan ahcun hriklunh hi a um ti lemlo. A ruang cu dat in sermi hrikthat (Chemical Pesticides) phun kip kan hman ruang ah a si khun. A hlei in, kan khuaruahning, kan nunning dirhmun (social standard) hna an hun i thleng i, mithmuh mi hrik kha an tlau. Asinain, hmuh lomi hrik, le Social Media cung ah hrik thar an kai ve. A tuhrawng kan Laimi ca ah hrik tihnung bakmi cu Thlicung Thawngzamh (Online Media) hrik asi.

 

Image result for laughing Lady pictures

 

Kan Lai Online Media Hrikpitum cheukhat

(1) A hrikpitum pakhatnak

Kan Lai ca/holh a sawksamtu hrik a si. Online cung ah kan Laica a phak hi Facebook a lar hnu in a kethlak a kau lengmang i, a tu ahcun Website ngeih le phaisa kawl a hun ichap than ca ah a kau chinchin. A tha tuk hringhran. Kan Laica tein nifatin thawngca an hun zamh khawh ca ah rianrang ngai le kau ngai in Laimi kan carel a kau ngai. Asinain, Cu Website thawngzamh ahcun Hrik a um. Lai catial a hrawktu, zapi hman mi CACC phung zul huam loin mah duh sahlam in sawh thlorh in ai sawhmi website thawngpang le thawngca phu tete an tam. Cheukhat an ca hoi hna cu chek ta loin, a rannak poah in tholhmi le sulthong loin tialmi ca an tam. Cucu, dingrep ngeih lo ngaingai khi asi. Laimi nih online News kan dirh ve ko, phaisa kan kawl ve ko a si ahcun rel awk ah a tliang thliahmah mi Laica an tial a herh tuk cang. Hihi a hrikpitum pakhatnak, ca/holh hrawktu hrik a si.

 

 

Related image

 

(2) A hrikpitum pahnihnak

Lungzur tlangtar hrik asi. Nunau Holhneem News hrik ti zong ah kawh khawh a si. Laimi cu kan holh le kan i hnemhning hi lung a zur le holh zaineem paoh ah ai daw khun le ai conghram khun khi kan lo tawn. Cu hnemh le hramh cu website news tlai cheukhat nih an thawngpang tlangpi bak ah hun tar hna kaw, a hlat ngainak Africa pa namte an sawhmi hoi hna kha an chungkhat thih hramh in a hun hramh hna bangkhin lau lengmang in kan hun hmuh tawn. “Ai ze, a cutluk poi cu aw! namte bak in a paw an vih ko cu ee, cu ka thin cu ee!” ti bak ah tlangtar an hun tar mei ko. Ca reltu an kan lauter dih. An nih an hmuitinh cu, an website kha careltu lau hna sehlaw, a kautu tam deuh hna seh timi khi a si bik. Cheukhat an tlangtar hoi hna cu, an tarmi le a chung ah an chiahmi ca kha ai paipakhel daih. A caan ahcun Online Thawngzamh hi mah le mah mualphoh ko ka lawhter tawn. (News Headline tialnak kong ahcun Nielsen Norman Group (NNG) i catialtu Jakob Nielsen tialmi World Best News Headlines: BBC timi hna khi rel ah a tha.)

 

Related image

 

(3) A hrikpitum pathumnak

Thawngzamh muisam hrawktu hrik. Hi hrik hi cu a tam-u sin ah a lang. Thawngzamh training (asiloah) thawngzamh phung le phai ca tal a rel bal lomi nih online ah duh tawkin News tial kan ithawk mi khi thil tha cu a si thlu bak lo. Mirang ca le Kawlca tial/leh thiamnak hin thawngzamh rian hi tampi ai tuan kho ko nain, siam a tling thlu taktak lo. Thawngzamh hi ning le phung a ngei ve. A ning le a cang tein tial le zamh ahcun sukkhak le chuahsual a tlawm. Thawngzamh pakhat min hna kan i put ve ko ahcun a tlawmbik W panga le H pakhat (5W1H) timi tal hi cu kan ruah pah ikpak ah a tha. Kan hnu ah Lai Online News catialtu pakhat he kan i mawhchiat. “5W1H hna hi na hngal bal maw?” tiah lungthiang tein ka hal. “Zeidah na chim duhnak?” tiah a ka leh. A poi ngai. Cu pin cu ka peh ti lo. Aw, News bawhkeuh te heih a si ve rih hi ka ti. Thawngpang nih thil dik a chim lio ah Lai Online News nih thildik a pawrh/perh. A hleihluat tukin a tanh (asiloah) a thlak/den. Thawngpang muisam a thlau pin ah lih fangkaro bak, phaisa hmuhnak tham ahcun tiah a hrawkhrawl zong a t’awn cop mei. Cucu, a hrikpitum pathumnak asi.

 

 

Related image

 

 

(4) A hrikpitum palinak

Zohdawh lo hrik: Laimi ca ah hrik thalo taktak asi. Keicu ka chim theo. News min te hna ahkhan Thawngthabia le zei ee ti tung i, thlahmi news hna zohchia khenhru, nu le pa sualnak muicawl (Video) hnawmtam hna an hun thlah ngam ko khi cu khuaruahhar taktak a si. Khi website in an hmuhmi phaisa khi Biakinn ah cheuhra cheukhat (aslioah) lawmthawh ah an pe ngam hnga maw ti ka ruat. Thangtha lawlaw in cubantuk website (porn site) kha a dang tein dirh lawlaw hmanh ka uar deuh. Laimi mi zapi nih kan i hrawmmi Thawngpang relnak group ah apiakia bak an hun tar ngam khi cu hawi kan lawh lonak a langh khunnak a si. Cubantuk cu Hriklunh hmanh ah lunh thalo, fihnung bak an si.

 

 

Image result for laughing Lady pictures

 

(5) A donghnak hrikpitum

Zapi hrik asi ko rua. Laimi nih Social Media (abik in Facebook) kan hmanning le kan muisam, a tulio kan sining hi hun cuanh ahcun sa.

Credit: Lengkawite

error: Content is protected !!