Press "Enter" to skip to content

India Federalism Deu: Myanmar Federalism A Deu Ve Lai Maw?

Nizan i tlangmi hriamtlai phu, Suu Kyi cozah le ralkap biaruahnak   ah Gen Min Aung Hlaing nih ‘Union’ in tlangmi ramkulh zei tik hmanh ah chuah lo ding biakam ser awk a hal hna.

 

A sullam cu, ‘Union’ in tlangmi ramkulh i tthen lo ding bia nan i kam ahcun, Federalism kong kan i ceih lai tinak a si.

 

‘Union’ in tlangmi chuah lo, politics ah ralkap i tel peng le federalism kong ceih ti hi awlokchong in theih a harmi thil ah ka rel.

 

Gen Min Aung Hlaing nih democracy le federalism a ti ve lengmang fawn tikah ka khuaruahharning ai chap. Tlangmi hriamtlai phu nih, “Union in kan chuak lai loh,” hei ti hna sehlaw, Kawl ralkap nih ‘federalism’ an timi hi zei bantuk ko khi dah a si hnga tiah theih duh meisei awk hrim a si.

 

Kan chan chung ah cun, Myanmar politics in ralkap hi pheo khawh phun a si bal fawn lai lo. Ralkap cawhpawlh Federalism phun a si te ttheo lai.

 

Kawl nihle an cikor ah rumro uk le nawlngeih a tlaihchan tukmi an si i, Federal uknak cu, Federal Cozahpi le Ramkulh Cozah nih nawlngeihnak i  cheuhbauh le i hrawm khi a si fawn tikah khuaruah a harpah.

 

Gen Min Aung Hlaing le a ralkap rual nih ‘Federalism’ in i uk ko cang usih an ti ahcun, ka zumhnak ah ralkap cawhpawlh + India Federalism tiang khi an kan pek duh cem ah a si te lai tiah ka zumh.

 

Indian Federalism khi Federal a deu a si, an ti. Australia, US le New Zealand ram Federalism bantuk a si lo. Asinain Canada Federalism he India Federalism cu, ai lo, an ti. Cucaah teh a si ko lai, Canada Phunghrampi le India Phunghrampi hi vawleicung ah phunghram sau bik a si, an ti.

 

India Federalism cu, federal cheubang, unitary cheubang tiah ai cawhpawlhmi a si, an ti. Myanmar Federalism cu, federal cheubang, unitary cheubang le ralkap uknak cheubang ai cawhpawlhmi a si te lai dah.

 

India Federalism ah cun, India phunghrampi pakhat lawng a um i, state le territory nih an i hrawm dih, Jummu le Kashmir state dah ti lo.

 

Awteh, India Central Cozah nih state le territory kip kha federal nawlngeihnak a pek ve ko hna. Asinain state le territory nih anmahte in phunghram dang i ser ve an sianh hna lo. US, Australia le New Zealand Federal uknak ah cun, state le territory kha anmahte in phunghram sernak nawl an ngei.

 

India zong cu, federal muisam a ken ve caah Central Cozahpi le ramkulh cozah nih i hrawmmi nawlngeihnak (concurrent powers) an ngei ve. Criminal Law, Civil Law, Thitumhnak Law tbk. ser ah nawlngeihnak an i hrawm. A dang veve in phung an i ser. Asinain  State Parliament nih concurrent list ah a ummi law an ser tikah Indian Parliament sermi he ai kalh lo a hau.

 

Indian Federalism ah cun, residual power timi kha state nih ngei lo in, Indian Parliament tu nih an ngeih. Australian Federalism ah cun, residual power hi state le territory nih an ngeih.

 

Unitary muisam cu, Central cozah nih a herh a ti ning paoh in, nawlngeihnak in uk khi a si.

 

Indian Federal uknak deu hi Central cozah bawi a uar ngaingaimi Myanmar nih ai cawn ve te lai, ralkap uknak he a cawhpawlh te ttheo lai ti hi ka hei zumh ve ning a si.

 

++Ca hi ahran ka rel manh rih lo++

Credit: B Chan Khar

error: Content is available