Press "Enter" to skip to content

Miphun Hmelchunhnak Ah Hmanmi Thah Hi Miphun Thah Bantuk A Si Maw?

Chin miphun nih vakok hi miphun hmelchunhnak phurtu a si ti an cohlan thlu le cohlan thlu lo kan thei lo nain Laimi tampi nih cun miphun hmelchunhnak phurtu a si tiah kan ruah. Upatnak kan ngei ngai. Vakok konglam zong tampi kan theih.

Zumhtlak nun a ngeimi a si; thih tiang in a nupi or a pasal caah zumhtlak nun a ngei. Chin miphun zong vakok bantukin zumhtlak nun a ngeimi kan si kan ti i, vakok hi kan pipu hna le kan miphun philh lonak le hmelchunhnak caah kan hman.

Cu tluk in kan sunhsakmi kan hmelchunhnak phurtu a simi vakok kilven le sunhlawih loin kan kah hna i kan thah lengmangmi hna hi cu miphun zeirel lo ngai a si. A ngaingai ti ahcun hi bantuk thil tuah hi miphun thah sullam zong in ruahpiak khawh an si i, miphun upatnak ngei lo bantukin ruahpiak khawh zong an si.

Khatlei kam in Chin miphun cu fingtlaang, horkuang le hmun kip ah khua a sami kan si tikah kan hmaika chuak saram le va paoh a that i a eimi kan si. Va a pelmi kan si; ram a vaimi kan si; ramsa in aa cawmmi kan si. Mah ruangah hin khua tampi kan ruat kho tawn lo.

Kan hmaika a chuakmi paoh thah khawh le hmuh khawh kha kan i lawmhnak cem thil pakhat a si. Vakok a kaptu pa zong hi miphun hmelchunhnak mit in zoh ahcun a palh ngai ko lai nain pumpak le Chin miphun dirhmun hoih in cun mawhchiat tlu awk a tha lo.

Asinain kan chan tiluan aa thlen lengmang bantukin Chin miphun nih kan nun chan tiluan zong kan thlen ve a hau cang. Saram kan hmuhning, inn zuat sathil kan hmuhning tbk hi kan i remh ngaingai an hau. Ningcangn loin thingram hrawhhral tbk zong kan hman ti lo a tha.

Indian pacan pakhat Mahatma Gandhi nih a chimmi hi uar a um ngaingai. A chimmi cu ‘miphun pakhat a lianngan le ngan lonak kan theih khawhnak cu zeitin dah a saram a tuahtoning hna a si timi theih khawh an si’ a ti. Hihi mifim ram ahcun a hmaan chin lengmang cang.

Ram thangcho ahcun saram an tuahtoning a tha tuk. Minung daithlan ruangah samram cungah harsatnak le tuarnak pek ti a um ti lo. Saram cungah an lungput a tha i saram caah hmunhma tha tein an chiahpiak hna. Chin miphun zong nih saram cungah kan lungput hi remh ngai kan hau ve cang.

error: Content is protected !!